– प्रख्यात ज्येष्ठ पत्रकार रणजित मेश्राम
संघवर्तुळात अलिकडे हिन्दुइज्म ऐवजी हिन्दूनेस यावर खल होतोय. शिवाय यापूढे हिन्दू धर्माला सनातन धर्म का म्हणावे या पर्यायाचाही विचार होत आहे.
इथे जे ठरेल, तेच मग हिन्दू समाजात रुळेल हेही खरे. इतक्या सूक्ष्म पध्दतीने मनोरचनेचा विचार होत असतो. तेच मग समाजधारणेत कायमचे रुढ होऊन जाते.
साम्यवादी विचारसरणीत या अशा आशयातून प्रातिनिधिक स्वरूपातून खूप ‘होमवर्क’ होत असे. ते तसे शब्द गोळीबंद स्वरुपात वापरात आणत असत.
‘बूर्झ्वा’,’रिएक्शनरी फोर्स’ असे कितीतरी शब्द असायचे जे ताकदीने अर्थ सांगून जायचे.
जे संघ विचारसरणीच्या विरोधात हिन्दू आहेत ते या बाबींना अराजकीय समजतात. कशाला बोलायचे, का व्यक्त व्हावे, आपणही हिन्दूच ! यात ते अडकून आहेत.
विरोधाला ते भावनेत वा प्रातिनिधिक शोधतात. वैचारिकता तेव्हा दुय्यम असते !
नुकतेच २४ ते २६ नोव्हेंबर दरम्यान बॅंकांक (थायलंड) येथे ‘तीसरे वर्ल्ड हिन्दू कांग्रेस’ संपन्न झाले. ६१ देशांच्या प्रतिनिधींनी इथे भाग घेतला. या जागतिक हिन्दू परिषदेत वर उल्लेखित दोन्ही संज्ञेवर मंथन झाले. अधिकृत वाचनात आले की, या परिषदेत ‘हिन्दुत्व या शब्दाला इंग्रजीत हिन्दुइज्म न म्हणता हिन्दूनेस म्हणावे’ असा ठराव घेण्यात आला.
हिन्दूइज्म हा शब्द हिन्दू समाजाच्या चांगलेपणावर आघात करतो असे यावर म्हटले गेले.
याशिवाय ‘सनातन धर्म’ हा पर्यायवाची शब्द होऊ शकतो असेही ठरले.
असा झालेला बदल हा पूढच्या प्रवासाला संयुक्तिक राहील हा याला आधार असतो. आंबेडकरी विचार विश्वात या प्रकृतीचा प्रांत खूपसा दुर्लक्षित आहे. असलाच तर एकेरी स्वरूपात पूढे येतो. तिथे स्वनाम धन्यता अधिक असते.
ते सांघिक स्वरूपात किंवा संगीती माध्यमातून होत नाही, हे शल्य आहे !
एखादा बुध्द पहाट काढतो. दूसरा भीमपहाट ! ते ‘क्लिक’ होऊन जाते. असे खूप सूचेल. सर्वदा हितदायी राहील काय ?
प्रत्येक क्रियेत प्रतिक्रिया दडून असते. आपण केवळ आपण नाही. अवतीभवती वेटाळ आहेच ! सुष्टदुष्ट दोन्ही ! ते कारण अकारण आपल्याकडे पहात असते.
अर्थात, बदलकारी प्रवासात आपला बदल सांघिकतेतून होणे हे केंव्हाही ईष्ट !
संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा
तसेच खालील वेबसाईटवर Click करा
दैनिक जागृत भारत
