“चळवळ, निळ्या झेंड्याची.!”
अभेद्य अशी आक्रमक निळ्या झेंड्याची आंबेडकरी चळवळ,
आता थंडाऊन,निपचित पडलीय,
हे पाहून इंगळ्या डसल्यागत
मन सुन्न होतय,
कानांना बहिरेपणा येतोय,
कारण ती विखुरली गेलीय,
अनेक गटा, तटात.!
हे जरी खरं असले तरी,
प्रसंगानुसार आंबेडकरी अनुयायी,
बिगर नेता,
गट, तट विसरुन , एकोप्याने ,
जीवाची बाजी लावून,
संघर्षांस उभे ठाकतात,
एकजीव होऊनी, वैर्याला.भिडतात,
अन्याय , अत्याचार्यांशी,
नेभळट जातीयवाद्यांशी,
पुतळा विटंबना करणार्यांशी,
माय भगिनींवर अन्याय, अत्याचार
करणार्यांशी,
अन बाबांची बदनामी करणाऱ्यांशी.!
ह्या परिस्थितीला कारण काय ?
सरकारला बेडरपणे जाब विचारणारा ताफा,
अन अन्यायाविरोधात धडाडणार्या तोफा,
काळाच्या पडद्याआड गेल्यात,
बंदुका सत्तेच्या उबदार खुर्चीत, निवांतपणे पहूडल्यात,
तलवारी गंजून,
इतस्ततः विखरल्या गेल्यात,
अन छोट्या छोट्या पुंजक्याचा,
क्षीण आवाज, कुणाच्याच कानापर्यंत जात नाहीय.!
परंतु वस्तुस्थिती अशी आहे की,
” यावतचंद्र दिवाकरो” या देशात सत्तेची खुर्ची शाबूत ठेवण्यासाठी”आंबेडकर” नावाचा जयजयकार अनिवार्य आहे,
मतांसाठी जिवाच्या आकांताने
जयघोष गरजेचा आहे,
अनिच्छेने का होईना, नतमस्तक होणे, अपरिहार्य आहे.!
अरे महाभागांनो,
“तुमचे ठेवता झाकून आणि आमचे पाहता वाकून”
सध्यस्थितीत कोणती चळवळ जिवंत दिसते?
पक्षीय चळवळ भंग पावली,
सामाजिक चळवळ नामशेष झाली,
कामगार चळवळ उध्वस्त केली,
अन राजकारणाची मंडई झाली,
एवढ्याने समाधान झाले नाही म्हणुन,
ह्या नतद्रष्टांनी महापुरुषांची देखील, जातीनिहाय वाटणी केली .!
आणि काय हो.!
आंबेडकरी गटबाजीची टिंगल का करता?
शिवसेना दुभंगली,
द्र. मु. क. ची शकले झाली,
कम्युनिष्ट पक्षाचे तुकडे झाले,
कॉंग्रेस तर अनेक गटात विखुरली,
समाजवादी अखेरचा श्वास घेताहेत,
अंतर्गत लाथाळ्यानी, भाजपा नेते
हैराण झालेत,
हे सर्व बघून तुम्हाला,
हसू का नाही येत?
पण कायम एक गोष्ट आहे सत्य,
गटबाजीला खतपाणी,
तुम्हीच घातले नित्य,
झालीच एकीची वज्रमूठ पक्की,
द्यावा लागेल सत्तेचा,
मोठा वाटा नक्की.!
पण आहोत आम्ही आशावादी,
सांगून गेलेत तथागत,
” जग परिवर्तनीय आहे “
घडेल असेच परिवर्तन कधीतरी,
होईल वज्रमूठ एकीची,
खेचून घेऊ, खुर्ची सत्तेची.!
खेचून घेऊ, खुर्ची सत्तेची.!!
खेचून घेऊ, खुर्ची सत्तेची.!!!
अरुण निकम,
9323249487,
मुंबई,
दिनांक…04/03/2026.
संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा
तसेच खालील वेबसाईटवर Click करा
दैनिक जागृत भारत
