आगीत अडकलेल्या ९ वर्षाच्या मुलीची अग्निशामक दलाच्या जवानांनी केली सुखरुप सुटका

कात्रज – शुक्रवारी मध्यरात्री बाराच्या सुमारास भारती विद्यापीठसमोर, नॅन्सी लेक होम्स या इमारतीच्या दुसऱ्या मजल्यावरील एका सदनिकेत ही आग लागली होती. या आगीतून एका ९ वर्षाच्या मुलीची (राजलक्ष्मी दिलिप सुकरे – वय ९) सुखरुप सुटका करण्यात अग्निशामक दलाच्या जवानांना यश आले.
अग्निशमन दलाला मिळाल्यानंतर दलाकडून अग्निशमनवाहन व एक रेस्क्यु व्हॅन, कात्रज, गंगाधाम, कोंढवा बुद्रुक येथून एकुण ४ वाहने रवाना करण्यात आली होती घटनास्थळी पोहोचताच सदर ठिकाणी मोठ्या प्रमाणात आग लागल्याचे पाहताच जवानांनी चारही बाजूने पाण्याचा मारा सुरू केला व त्याचवेळी घरामधे कोणी अडकले आहे का याची खात्री करीत असताना एक लहान मुलगी खिडकीमधील लोखंडी ग्रिलमधे अडकल्याने वाचवण्याकरिता आरडाओरडा करीत असल्याचे निदर्शनास आले.
त्यावेळी जवानांनी तातडीने मुलीला वाचवण्याचे प्रयत्न सुरू केले. तिच्या बचावासाठी दोन बीए सेट तसेच हायड्रोलिक कटर, कटावणी, रश्शीचा वापर करत खिडकीजवळ शिडी लावण्यात आली. त्याचवेळी काही जवानांनी शेजारील सदनिकेच्या गच्चीवरुन मुलीच्या सुटकेसाठी प्रयत्न सुरू केले. अवघ्या पाच ते दहा मिनिटात जवानांच्या प्रयत्नाला यश आले.

आगीमधे अडकलेल्या मुलीची सुखरुप सुटका करण्यात आली. तसेच, सदरील आग वीस मिनिटात नियंत्रणात आली. घराचे मोठे नुकसान झाले असून आग इलेक्ट्रिक शॉर्टसर्किटमुळे लागल्याचा अंदाज आहे. या घटनेत कोणतीही जिवितहानी झालेली नाही.

या कामगिरीत दलाचे अधिकारी प्रदिप खेडेकर, वाहनचालक अतुल मोहीते, तांडेल मंगेश मिळवणे व जवान रामदास शिंदे, तेजस मांडवकर, चंद्रकांत गावडे, सुधीर नवले, लक्ष्मण घवाळी, दिगंबर बांदिवडेकर, तेजस खरीवले, अर्जुन यादव, अभिजित थळकर यांनी सहभाग घेतला.

संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा

तसेच खालील वेबसाईटवर Click करा
दैनिक जागृत भारत