तऱ्हेवाईकपणा माणसाचा…!

नर असो वा नारी,
मिळे जन्म एकदाची, ह्या भूतलावरी,
झोपडीत असो की महालात,
डोंगरावर की दऱ्या , खोऱ्यात,. असो कुरूप वा सुंदर,
सशक्त की अशक्त,
रंग, रूप ही नसे आपल्या हातात.!

असे माणूस तऱ्हेवाईक,
चांगला असे कुणी ,तर निघे कुणी वाईट,
करी कुणी मनस्वी प्रेम, तर कूणी कसायागत निर्दय,
स्वभावाने असे कुणी शांत, तर कुणी तापट,
असे कुणी मनाचा मोकळा, तर मनी वसे कुणाच्या कपट,
निघे कुणी धाडसी, तर कुणी मनाचा घाबरट,
असे कुणी दानशूर, तर कुणी मख्खीचुस चिकट.!

नसे कमतरता जगी , ढोंगी बाबा, महाराजांची,
जमाविती माया करोडोंची,
भूलविती लोकांसी, करिती कांड,
खाती हवा जावुन , तुरुंगाच्या आड,
झाकोळून जाती खरेखुरे,
समाजासी नीतीचे, पाठ शिकवणारे.!

निपजले पुण्यात्मे,
वेचला जन्म, सत कर्मात,
मिळवुन गेले जागा ,
पुस्तकाच्या पानात,
घेती जन्म निलाजरे,
घालविती वाया , आयु आय्याशित,
जुगारात, अन् व्यसनात,
न ध्यानी घेती, मूल्य जीवनाचे.!

जीव कैक, असती धरतीवरी,
भावनेने कर्तव्याच्या, करीती तन, मन, धनाने, सेवा रोग्यांची, विकलांगांची , वृद्धांची, अन् गरजवंतांची,
न येई मनात , करावी प्रसिद्धी, तसूभरही , आपल्या कामाची.!

उपटण्या श्रेय, टपून असती बाजींदे ,
चहूकडे काही ,
न करता काहिही ,
करिती लुडबुड,
दर्शविती मीच , करतो सर्वकाही,
लोक मूर्ख नसती, जाणून असती सर्वकाही.!

येई प्रसंग बिकट संकटाचा ,
पडून दुष्काळ, भूकंप, नैसर्गिक आपत्तीचा,
येई चहूकडून ओघ मदतीचा,
गरीब ही भागवि, क्षुधा भुकेल्याची,
राहून अर्धपोटी, देई अर्धी भाकरी ताटातली.!

करी याचना , गरीब कांजुषासी,
रुपया, दोन रुपयांची,
भरण्या खळगी पोटाची,
असता बटव्यात, पूडकी नोटांची,
देई हाकलून, न येई कीव, पिचलेल्या देहाची.!

उधळती धन दौलत ,होऊन पागल,
नारीच्या रुपावरती,
येती कहाण्या, कानावरती,
कैक खंगले , झाले रावाचे रंक,
न मिळता ती, गेले घेऊनी , उरात खंत सरणावरती.!

दिसे रूपे अनेक स्वभावाची,
बोलण्यात खोटे, असे माणूस पटाईत ,
पण सत्यवचनी ही, असती आसपास बहुत,.
कधी न सांगे तो कुणाला, मनातील बेत,
पण मनकवडे ही , चहूकडे असती फिरत.!

असे तो सर्वात पुढे, बढाया मारण्यात,
पण करिती टिंगल , माघारी हसता हसत,
ना धरी हात कुणी त्याचा,चुगली करण्यात, “पाहुण्यांच्या काठीने , साप मारण्याची” कला त्यासी , भारी असे अवगत.!

उघडता वर्तमानपत्र ,
न वेधी लक्ष्य त्याचे, बातमी सात्विक अन् पुण्य कर्माची,
वाचून घेई खबर प्रथम, खून,दरोडे,अन्
बलात्काराची.!

घडविला इतिहास, त्याने ह्या भूतलात,
उंचावली मान , दाही दिशांत,
पण करुनी भेद माणसात,
वागविले शुद्राला हिन जनावरा हुन,
ठेविले अज्ञानात, दारिद्र्यात,अन् लाचारित,
गेली मान , खाली खोल खड्ड्यात.!

मिळविण्या पुण्याई, शोधितसे देवासी डोंगर कपारी, कधी चालतसे अनवाणी,
करून दानधर्म, देई देणगी मंदिरासी, जन्मदात्यांना मात्र घरी , ठेवी उपाशी.!

न समजे झालंय , काय त्यासी?
होऊन स्वार्थी, विचार करी आपलाची,
विसरुनी नातीगोती, रक्ताची,
करी तो पावलोपावली , किंमत पैशाची.!

असे खुबी अंगी त्याच्या , गुण, अवगुणाची,
कधी होऊन नीरजा, वाचवी प्राण निरागस जीवांचे, देऊनी बलिदान स्वतःचे,
कधी होऊनी कसाब, पाडे मुडदे अनेकांचे,
तर कधी होऊनी शहाजहान,रूपाने ताजमहालाच्या, उभारी प्रतीक प्रेमाचे.!

डचमळ त्याच्या अंतर्मनाची,
न उमजे कुणाला ही,
असे तो शांत, समंजस, प्रेमळ, विवेकी,
तसाच, अविवेकी,अज्ञानी,क्रूर,भयंकर,
प्रकट होई तो त्याच्या कृती, आचार , विचार , अन् , वर्तणुकीतून ,

नसे देव , दानव, ह्या जगतात,
वृत्ती असती त्या, भरल्या ठासून माणसात,
ही दोन्ही रूपे, सामावली मानवात,
त्यागता त्याने कपट, असुया, हिंसा, वृत्ती अत्याचारी ,मोह, वासना,
स्वार्थ, वगैरे दुर्गुण,
त्याच्या परी देव दुसरा , कोणी नसती ह्या धरती वरी.!

त्याच्या परी देव दुसरा, कोणी नसती ह्या धरती वरी.!!

त्याच्या परी देव दुसरा , कोणी नसती ह्या धरती वरी.!!!

अरुण निकम.
9323249487.
मुंबई,
दिनांक 18/09/2026.

संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा

तसेच खालील वेबसाईटवर Click करा
दैनिक जागृत भारत