राजमाता पुण्यश्लोक अहिल्यादेवी होळकर अध्यासन केंद्राच्या अध्यक्षपदी ॲड. मंचकराव डोणे, तर सचिवपदी डॉ. सुरेश वाघमारे

लातूर : लातूर येथे नुकत्याच स्थापन करण्यात आलेल्या राजमाता पुण्यश्लोक अहिल्यादेवी होळकर अध्यासन केंद्राच्या अध्यक्षपदी ॲड. मंचकराव डोणे, तर सचिवपदी डॉ. सुरेश वाघमारे यांची निवड करण्यात आली आहे.

या अध्यासन केंद्राच्या उपाध्यक्षपदी विजय जाधव व डॉ. बाळासाहेब गोडबोले, सहसचिवपदी बाळकृष्ण धायगुडे, तर कोषाध्यक्षपदी सोनेराव माने यांची निवड करण्यात आली. तसेच सन्माननीय सदस्य म्हणून हनुमंत वाघलगावे, प्रा. मोहन भंडे, शेख शफी, अॅड. राजकुमार कांबळे व श्रीमंत वाघमारे यांची निवड करण्यात आली आहे.

अध्यासन केंद्राचे सल्लागार तथा मार्गदर्शक म्हणून डॉ. जयद्रथ जाधव, डॉ. नारायण कांबळे, संभाजी सुळ, प्रा. लहूकांत शेवाळे व प्रा. रमेश पारवे यांची निवड करण्यात आली.

राजमाता पुण्यश्लोक अहिल्यादेवी होळकर यांच्या महान जीवनकार्याची समाजाला ओळख व्हावी, त्यांच्या कार्याचा वास्तव आणि चिकित्सक अभ्यास व्हावा, तसेच त्यांच्या जीवनावर संशोधन करण्यासाठी नव्या पिढीला प्रेरणा मिळावी, हा या अध्यासन केंद्राचा प्रमुख उद्देश आहे. अहिल्यादेवींच्या जीवनाशी व कार्याशी संबंधित विविध विषयांवर व्याख्याने, चर्चासत्रे, परिसंवाद आणि संशोधनपर उपक्रम आयोजित करण्याचे नियोजन या माध्यमातून करण्यात येणार आहे.

अहिल्यादेवी होळकर यांच्या विचारांचा आणि कार्याचा अभ्यास केवळ एका समाजापुरता मर्यादित न राहता सर्व समाजघटकांपर्यंत पोहोचावा, या व्यापक भूमिकेतून विविध जाती-धर्मातील अभ्यासक, संशोधक, कर्मचारी, अधिकारी आणि सामाजिक क्षेत्रातील जाणकार व्यक्तींना एकत्र आणून या अध्यासन केंद्राची स्थापना करण्यात आली आहे.

पुण्यश्लोक अहिल्यादेवी होळकर यांच्या लोककल्याणकारी विचारांचा, न्यायप्रिय प्रशासनाचा, स्त्रीशक्तीचा आणि सामाजिक बांधिलकीचा वारसा पुढील पिढीपर्यंत पोहोचविण्याचे महत्त्वपूर्ण कार्य या अध्यासन केंद्राच्या माध्यमातून घडावे, अशी अपेक्षा व्यक्त होत आहे.

नवनिर्वाचित सर्व पदाधिकारी, सन्माननीय सदस्य, सल्लागार व मार्गदर्शकांचे अध्यासन केंद्रातील सदस्य आणि विविध क्षेत्रातील मान्यवरांनी अभिनंदन करून पुढील कार्यासाठी शुभेच्छा दिल्या आहेत.

संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा

तसेच खालील वेबसाईटवर Click करा
दैनिक जागृत भारत