महाराष्ट्रात खाद्यतेलातील भेसळ रोखण्यासाठी राज्यव्यापी विशेष तपासणी मोहीम राबवावी – महाराष्ट्र भेसळ मुक्त संघर्ष कृती समिती

0 1 1 minute read

महाराष्ट्र भेसळ मुक्त संघर्ष कृती समिती
दिनांक : २४ जुलै २०२६

छत्रपती संभाजीनगर : महाराष्ट्र भेसळ मुक्त संघर्ष कृती समितीच्या वतीने महाराष्ट्राचे मुख्यमंत्री, अन्न व औषध प्रशासन मंत्री तसेच अन्न व औषध प्रशासन आयुक्त यांना निवेदन सादर करून राज्यभरातील खाद्यतेल उत्पादन, साठवण, पॅकिंग, वाहतूक व खुले खाद्यतेल विक्रीची विशेष तपासणी मोहीम राबविण्याची मागणी करण्यात आली आहे.
समितीने म्हटले आहे की, खाद्यतेल हा नागरिकांच्या आरोग्याशी थेट संबंधित विषय असून राज्यातील सर्व उत्पादक, रिफायनर्स, पॅकर्स, री-पॅकर्स, घाऊक व किरकोळ विक्रेत्यांची विशेष तपासणी करण्यात यावी. खाद्यतेलाचे नमुने शासनमान्य प्रयोगशाळेत तपासणीसाठी पाठविण्यात यावेत.
तसेच संबंधित व्यापाऱ्यांचे FSSAI परवाने, खरेदी-विक्री नोंदी, स्टॉक रजिस्टर, वाहतूक कागदपत्रे व इतर आवश्यक अभिलेखांची सखोल पडताळणी करण्यात यावी. तपासणीदरम्यान चुकीचे लेबलिंग, भेसळ किंवा इतर अनियमितता आढळल्यास Food Safety and Standards Act, 2006 तसेच इतर लागू कायद्यांनुसार कठोर कारवाई करण्यात यावी, अशी मागणी करण्यात आली आहे.
जिल्हानिहाय तपासणी व कारवाईचा अहवाल सार्वजनिक करण्यात यावा, नागरिकांसाठी विशेष तक्रार कक्ष व हेल्पलाईन सुरू करण्यात यावी तसेच खुले खाद्यतेल विक्री व वितरण व्यवस्थेत पारदर्शकता आणण्यासाठी प्रभावी धोरण राबविण्यात यावे, अशीही मागणी समितीने केली आहे.
समितीने स्पष्ट केले की, या मोहिमेचा उद्देश कोणत्याही प्रामाणिक व्यापाऱ्याला त्रास देणे नसून नागरिकांना सुरक्षित, दर्जेदार व नियमांनुसार खाद्यतेल उपलब्ध करून देणे, भेसळ रोखणे आणि खाद्यतेल व्यापारात पारदर्शकता निर्माण करणे हा आहे.
यावेळी समितीचे अब्दुल अजीम पटेल, सय्यद मुकर्म सय्यद महेमूद, आवेस इलियास कादरी, काज़ी नजीमुद्दीन,शेख तौफिक, अथर कुरैशी, अमीर शेख,सय्यद अफफान उपस्थित होते.

संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा