लासलगाव महाविद्यालयात मराठी भाषा गौरव दिन उत्साहात संपन्न
लासलगाव- येथील नूतन विद्या प्रसारक मंडळाचे कला वाणिज्य व विज्ञान महाविद्यालय, लासलगाव येथे मराठी विभागाद्वारे मराठी भाषा गौरव दिन उत्साहात साजरा करण्यात आला. याप्रसंगी संस्थेचे सरचिटणीस मा.तात्यासाहेब होळकर व मा.प्राचार्य डॉ.आदिनाथ मोरे यांचे हस्ते पालखीतील ग्रंथांचे पूजन करण्यात आले होते. उपप्राचार्य प्रा.भूषण हिरे, डॉ.सोमनाथ आरोटे, डॉ.प्रदीप सोनवणे. डॉ.एस.के.शिंदे, प्रा. किशोर अंकुळनेकर उपस्थित होते.
सोहळ्याची सुरुवात ग्रंथदिंडीने करण्यात आली. टाळ-मृदुंगाचा आवाज व ग्यानबा-तुकारामच्या जयघोषाने विद्यार्थ्यांच्या हर्ष उल्हासात महविद्यालयीन परिसर दुमदुमून गेला होता. कार्यक्रम संयोजक डॉ.प्रतिभा जाधव यांनी कार्यक्रमाचे प्रास्ताविक व पाहुण्यांचा परिचय करून दिला. त्यात त्या म्हणाल्या की, मराठी भाषेची पूर्वपीठीका सांगत तरुणाईने अधिक सजगतेने आपली मातृभाषा मराठीप्रती जागरूक होणे आवश्यक आहे तेव्हाच ती अधिकाधिक समृद्ध व सुदृढ होत जाईल. व्यवहारात मातृभाषेचा अधिकाधिक वापर व्हावा. भाषा संवादाचे सशक्त माध्यम आहे. त्यात प्रभावीपणे अभिव्यक्त होता येते. अधिकाधिक लेखन, वाचन, भाषण मराठीत झाले म्हणजे मातृभाषेच्या संवर्धनासाठी ते महत्वाचे ठरणार आहे.” अशी भावना व्यक्त केली.मराठी भाषा गौरव दिनाचे औचित्य साधून ‘बहिणाईचा लेक सोपानदेव चौधरी: एक प्रयोगात्मक काव्य मैफल हा कवितेचा कार्यक्रम संपन्न झाला. कार्यक्रमाचे अध्यक्ष डॉ.सोमनाथ आरोटे यांनी मराठी भाषा गौरवदिनानिमित्त सदिच्छा दिल्या. मराठी विभागाच्या विविध उपक्रमांचे कौतुक करत प्रोत्साहित केले. मान्यवरांच्या हस्ते मराठी विभागाच्या प्रतिबिंब हस्तलिखिताच्या ‘माझे स्वप्न माझे ध्येय’ ह्या विशेषांकाचे प्रकाशन झाले. तसेच मराठी भाषा गौरव दिनानिमित्त आयोजित, निबंध, हस्तलेखन स्पर्धेतील विजेत्यांचा प्रमाणपत्र व ग्रंथभेट देऊन सत्कार करण्यात आला. प्रा.प्रांजली ढेरे सूत्रसंचालन केले. प्रा.संदीप ठाकरे यांनी कार्यक्रमाचा आढावा घेत आभारप्रदर्शन केले. कार्यक्रमास विद्यार्थ्यांचा उदंड असा प्रतिसाद या कार्यक्रमास लाभला.
संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा
तसेच खालील वेबसाईटवर Click करा
दैनिक जागृत भारत
