छत्रपती संभाजीनगरमध्ये मोठी कारवाई, २५० कोटींचे अमली पदार्थ जप्त; पैठण औद्योगिक वसाहत अन् शहरात छापेमारी

छत्रपती संभाजीनगर : राज्यभर गाजत असलेल्या ड्रग्ज प्रकरणानंतर पैठण औद्योगिक वसाहत, छत्रपती संभाजीनगरमध्येही छापेमारी करण्यात आली आहे. यामध्ये कोकेन, मेफाड्राॅन, केटामाईन, या तीन प्रकारचा २५० कोटींपेक्षा अधिक किंमत असलेला अमलीपदार्थांचा साठा जप्त करण्यात आला आहे. या प्रकरणी दोघांना ताब्यात घेण्यात आले आहे. त्यातील एकाने आत्महत्येचा प्रयत्न केल्याने त्याला खासगी रुग्णालयात दाखल करण्यात आले आहे. तर संदीप शंकर कामावत याला अटक करण्यात आली असून त्याला पैठणच्या प्रथम वर्ग न्यायदंडाधिकाऱ्यांनी २३ ऑक्टोबरपर्यंत पोलीस कोठडीत ठेवण्याचे आदेश दिले आहेत.

संदीप कामावत याला सिडको पोलीस ठाण्याच्या कोठडीत ठेवण्याविषयीचे केंद्रीय महसूल गुप्तचर विभागाचे पुणे येथील अधिकारी विशाल संगवान यांनी पत्र दिल्याची माहिती सिडकोच्या पोलीस निरीक्षक गीता बागवडे यांनी दिली. गुजरा़तमधील एका गुन्ह्यातील तपासाच्या अंगाने अहमदाबादमधील केंद्रीय महसूल गुप्तचर यंत्रणा (डीआरआय), तेथील गुन्हे शाखा व पुण्यातील डीआरआय विभागाचे पथक २० ऑक्टोबरपासून या कारवाईसाठी शहरात दाखल झाले आहे. अमली पदार्थ बनवणारी कंपनी पैठण येथील आैद्योगिक वसाहतीमध्ये आहे. तेथील महालक्ष्मी इंडस्ट्रिजमध्ये केलेल्या छापेमारीत मेफाड्रोन व केटामाईन आढळून आले आहे. तर आरोपींच्या घराच्या परिसरातून २३ किलो कोकीन, २.९ किलो मेफाड्रोन आणि ३० लाख रुपये रोख रुपये आढळून आले. तर पैठणच्या महालक्ष्मी इंडस्ट्रिजमध्ये मेफाड्रोन व केटामाईन अनुक्रमे ४.५ किलो व ४.३ किलो सापडले. तसेच याशिवाय मेफाड्रोन मिश्रण असलेले ९.३ किलोचे अंमली पदार्थ जप्त करण्यात आले आहे. जप्त करण्यात आलेल्या अंमली पदार्थांची किंमत २५० कोटींपेक्षा अधिक असल्याची माहिती केंद्रीय महसूल गुप्तचर विभागाने प्रसिद्ध केलेल्या पत्रकातून देण्यात आली आहे. ही कारवाई रोहीत निगवेगकर यांच्या मार्गदर्शनाखाली झाल्याचे सांगण्यात आले. या प्रकरणाचे धागेदोरे आंतरराष्ट्रीय स्तरापर्यंत असू शकतील असे सांगण्यात येत आहे.

संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा

तसेच खालील वेबसाईटवर Click करा
दैनिक जागृत भारत