महात्मा फुलेंच्या खानवडीत ‘कंपनी राज’; जिल्हा परिषद शाळेच्या खासगीकरणाचा वंचित बहुजन युवा आघाडीकडून तीव्र निषेध.

क्रांतीसूर्य महात्मा जोतिबा फुले यांनी बहुजनांसाठी शिक्षणाची दारे खुली केली, त्याच फुले यांच्या मूळ गावी खानवडी येथून शिक्षणाचे खासगीकरण करण्याचा ‘धक्कादायक’ घाट राज्य सरकारने घातला आहे. जिल्हा परिषदेच्या शाळेत ‘पीपीपी’ सार्वजनिक-खासगी भागीदारी तत्त्वावर खासगी कंपनीला प्रवेश देऊन सरकारने शिक्षण क्षेत्रात ‘कंपनी राज’ आणले असल्याचा आरोप करत, वंचित बहुजन युवा आघाडीने या निर्णयाचा तीव्र निषेध केला आहे.

पुणे जिल्हा परिषदेची खानवडी येथील ‘जोती-सावित्री’ शाळा ‘क्रिस्टल हाउस इंडिया’ या खासगी कंपनीमार्फत चालवण्यात येणार आहे. ही राज्यातील पहिलीच ‘पीपीपी’ तत्त्वावरील शाळा असल्याचे मिरवले जात असले तरी, प्रत्यक्षात हे ग्रामीण भागातील गरीब विद्यार्थ्यांच्या हक्काच्या शाळेचे खासगीकरण असल्याचे स्पष्ट होत आहे.शनिवारी मुख्यमंत्री देवेंद्र फडणवीस ह्या शाळेचे उद्घाटन करणार आहे.फुलेंच्या वारशाचा अपमान असल्याचे वंचित बहुजन युवा आघाडीचे म्हणणे आहे.
ज्या मातीने देशाला मोफत आणि सक्तीच्या शिक्षणाचा विचार दिला, त्याच मातीत शिक्षणाचा व्यापार सुरू करणे हा महात्मा फुले आणि सावित्रीबाई फुले यांच्या विचारांचा अपमान आहे.
शिवाय ह्यात आरक्षणाला बगल दिली जाणार असून खासगी कंपन्यांद्वारे शिक्षक भरती आणि व्यवस्थापन झाल्यास भविष्यात आरक्षणाच्या नियमांना हरताळ फासला जाण्याची भीती आहे.
ह्यामुळे जिल्हा परिषदांचे अस्तित्व धोक्यात येणार असून खासगी कंपन्याच शाळा चालवणार असतील, तर जिल्हा परिषदेच्या शिक्षण विभागाची गरज संपविली जाईल.हा शिक्षण यंत्रणा खिळखिळी करण्याचा प्रयत्न आहे.महात्मा फुलेंच्या नावाने राजकारण करायचे आणि त्यांच्याच जन्मगावातून शिक्षणाचे बाजारीकरण सुरू करायचे, हा सरकारचा दुटप्पी चेहरा आहे. जिल्हा परिषदेच्या शाळेवर खासगी कंपनीचे नियंत्रण असणे म्हणजे गरीब विद्यार्थ्यांच्या भविष्याशी खेळणे होय. वंचित बहुजन युवा आघाडी या ‘पीपीपी’ मॉडेलचा कडाडून विरोध करते आणि हे खासगीकरण तात्काळ थांबवण्याची मागणी वंचित बहुजन युवा आघाडी प्रदेश महासचिव राजेंद्र पातोडे ह्यांनी केली आहे.शिक्षण हा राज्याचा घटनात्मक अधिकार आहे, तो नफ्यासाठी खासगी कंपन्यांच्या घशात घालता येणार नाही. सरकारने हा निर्णय मागे न घेतल्यास संपूर्ण महाराष्ट्रात वंचित बहुजन युवा आघाडीच्या वतीने तीव्र आंदोलन छेडण्यात येईल, असा इशाराही यावेळी देण्यात आला आहे.

संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा

तसेच खालील वेबसाईटवर Click करा
दैनिक जागृत भारत