दिनानाथ मंगेशकर हाॅस्पिटल प्रकरणामुळे पुन्हा पुन्हा मी इतिहासामधे जात आहे ..

डाॅ. नयना सोनवणे-खिलारे

गेल्या दोन दिवसांपासून गाजत असलेले दिनानाथ मंगेशकर हाॅस्पिटल प्रकरणामुळे पुन्हा पुन्हा मी इतिहासामधे जात आहे ..
पुन्हा इतिहासामधे जाऊन “पूर्वी घेतला गेलेला चुकीचा निर्णय पुन्हा सुधारता येऊ शकला असता तर?” हा विचार त्रास देतोय !!!

दिनानाथ मंगेशकर हाॅस्पिटलच्या जागेसोबत आमच्या लहानपणच्या आठवणी जोडल्या गेल्या आहेत. एक भावनिक नातं आहे त्या जागेसोबत माझ्या घरच्या सर्वांचच.
ती 6 एकर जागा आणि त्याच्या बाजूच्या हिमाली आणि संकुल सोसायटी हा पूर्ण पट्टा आमची ( खिलारे कुटुंबाची) शेती होती. आमचे काका श्री.अमृतराव व कै.काशिश्वर खिलारे हे तीथे शेती करत होते त्यांनीही या प्रस्तावास लगेच मान्यता दिली.
हिमाली आणि संकुल बांधकाम चालू होणार होत, मधला 6 एकर पट्टा मोकळाच होता.
मा.शरद पवार, मा.विलासराव देशमुख हे
माझे वडिल पुण्याचे माजी महापौर दि.ज.खिलारे यांचे मित्र होते. त्यांचे नेहमीच घरी येण जाण होत.
लता मंगेशकर या पुणे शहरामधे हाॅस्पिटलसाठी जागा शोधत होत्या. तशी इच्छा त्यांनी शरदरावांना बोलून दाखवली.
या सर्व गोष्टींची मी आणि सर्व खिलारे परिवार साक्षीदार आहोत. – शरद पवार यांचा भाऊंना फोन आला की खिलारेसाहेब कर्वॅरोड डेक्कन काॅर्नर ते पौडफाट्याच्या पुढेपर्यंत सर्वं तुमच्या मालकीच्या जागा आहेत. गरवारे काॅलेज, नळस्टाॅपचं चर्च, महिलाश्रमाच्या जवळपास 15 एकर जागा तुमच्या वडिलांनी (जयसिंगराव खिलारे) यांनी विनामोबदला दिली आहे. – लतादिदी धर्मादाय हाॅस्पिटलसाठी जागेच्या शोधात आहेत, एरंडवण्यामधे तुमची शेती आहे. त्यातला 6 एकर जागेचा पट्टा दिदींना धर्मादाय हाॅस्पिटलसाठी द्यावा.
शरद पवारांनी ही विनंती करतानाच जाता जाता एक गोष्ट कानावर घातली जी हसत हसत धमकी होती की खिलारेसाहेब कर्वेरोडच्या अर्ध्या जमिनीचे मालक तुम्ही आहात पण सिलींगचा कायदा आलेला आहे. जमिनी सिलींगमधे जातील त्यापेक्षा धर्मादाय हाॅस्पिटलसाठी ती
जागा द्यावी. ही विनंती वजा धमकी होती.
गरवारे काॅलेज, महिलाश्रम,चर्च अशा कितीतरी जागा सिलींगचा कायदा नसताना आमच्या खिलारे परिवाराने दान केल्या होत्या हे पवारसाहेब विसरले होते…. मंगेशकरची जागा तर फक्त 6 एकर होती.
माझ्या आत्याचे आणि मोठ्या बहिणीचे सासरे मा.आमदार नामदेवराव मते, माझ्या लहान बहिणीचे सासरे मा. खासदार विठ्ठलराव तुपे यांनी पुन्हा पुन्हा सांगीतलं की भाऊसाहेब तुम्ही खिलारे कुटुंबाने स्वतः तीथे काॅलेज किंवा हाॅस्पिटल बांधा..
पण आमच्या खिलारे कुटुंबातील सर्वांनी आज्जी आजोबा, काका, आई, काकू, आत्या, आम्ही बहिण भावांसोबत ती जागा द्यावी की नाही याबद्दल चर्चा होऊन सर्व संमतीने ही जागा विनामोबदला देण्याचे ठरले होते आणि तसा शब्द शरदरावांना दिला गेला होता. त्यामुळे रोज कोणाचे ना कोणाचे घरी फोन यायचे, एवढी मोठी सोन्यासारखी जागा नका देऊ मंगेशकरांना. धर्मादायी हाॅस्पिटलच्या नावाने आज तुम्ही जागा द्याल पण भविष्यात तीथे पैशांचा कारखाना सुरू होईल आणि तीच भविष्यवाणी नंतर वेळोवेळी अनुभवात आली..
खिलारे यांचे नाव हाॅस्पिटलला द्यावे किंवा एक पूर्ण मजला तुमच्या कुटुंबासाठी नेहमी रिझर्व ठेवावा असही बरेच जणांनी सुचवलं होत. पण दिनानाथ मंगेशकर हाॅस्पिटलच्या सुरवातीपासून शेवटपर्यंतच्या 6 एकर परीसरातील अगदी एखाद्या फरशीवरही आम्ही खिलारेंच नाव लावून घेतल नाही. परंतु गोरगरीब पेशंटला ट्रिटमेंटवर 30 % सुट देण्यात यावी ही इच्छा आम्ही बोलून दाखवली होती.
आणि याच गोष्टीमुळे मनापासुन वाईट वाटतं जेंव्हा या वास्तूमधे पुन्हा पुन्हा पैशांसाठी उपचारांअभावी रूग्णांचे बळी जातात आणि इथे रूग्णांकडून अवाच्यासवा दर आकारले जातात.
ह्रद्ययनाथ, लतादिदी, आशादिदी, शरदकाका संर्वांशी आमचे मैत्रीचे संबंध आहेत. या जागेची बोलणी चालू असताना हे सर्वजण आमच्या घरी येत असत आणि तासनतास चर्चा चालत असे..
माझी बहिण वर्षा तुपे हिच्या लग्नामधे 30 एप्रिल 1989 मधे जवळपास 20 हजार लोकांच्या साक्षीने कलश स्वरूपात ही जागा मंगेशकर कुटुंबियांना दिली गेली होती.
हाॅस्पिटल बांधलं गेलं आणि काही वर्षातच हाॅस्पिटल मॅनेजमेंट ज्ञानप्रबोधनीचे डाॅ. केळकर यांच्या हातात गेलं…
या जागेचे मूळ मालक खिलारे कुटुंबातील माजी महापौर खिलारे यांच्या बायपास सर्जरीसाठी लाखो रूपये बील आकारलं गेलं, तेही आम्ही समजू शकतो की जो तो त्याच्या स्वभावानुसार वागतो. परंतु बीलामधे डाॅ. धनंजय केळकरांनी स्वतःचे व्हिजीट चार्जेस 600रू. लावले होते, जेव्हा की ती पेशंट व्हिजीट नव्हती तर ज्या माणसाने कोट्यावधींची जागा तुम्हाला दान केली त्या माणसाला भेटायला ते आले होते.

 "मूळ मालक आम्ही आहोत बील देणार नाही किंवा बिल कमी करा" ही दादागिरी, माज किंवा शूद्रपणा खिलारे कुटुंबाने दाखवला नाही. धनंजय केळकरांनी लावलेलं स्वतःचे 600रू. व्हिजीट चार्जेस यालाही आम्ही हसण्यावारी नेलं..

त्या प्रत्येक घटनेचे आम्ही खिलारे परीवारातील सदस्य साक्षीदार आहोत आणि आता याची खंत वाटते की विना मोबदला दिल्या गेलेल्या जागेचा वापर पैसा कमविण्यासाठी केला जात असताना जेव्हा इथे कोणाचा नाहक बळी जातो – हे मात्र आम्ही हसण्यावारी नेऊ शकत नाही.

दिनानाथ मंगेशकर हाॅस्पिटलमधे धर्मादायाच्या नावाखाली चाललेली लुबाडणूक आणि पैशांअभावी पेशंटच्या मृत्यूस कारणीभूत ठरलेल्या मंगेशकर हाॅस्पिटल प्रशासनाचा आम्ही मूळ मालक खिलारे परिवार निषेध करत आहोत ! घडलेल्या वाईट घटनेचे आम्हाला दुःख आहे.

डाॅ. नयना सोनवणे-खिलारे 8007001111

संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा

तसेच खालील वेबसाईटवर Click करा
दैनिक जागृत भारत