एक असा ही आशावाद.!”
संकट कोरोनाचे, आले अकल्पित,
टाळण्या संसर्ग,
केला लॉक डाऊन घोषित, पसरली शांतता मसनागत , दिसेनासि झाली माणसं,
शहरात, खेड्यात, रस्त्यात, अन गल्लीबोळात,
बसली सगळीच चिडीचूप, घरात.!
झाले मस्तक बधीर, अन सुन्न मन,
बघून प्रेतांचा सडा,
सततच्या बातम्यांनी, अखंड राहती,
ओल्या डोळ्यांच्या कडा,
लागती लांबच लांब रांगा,
प्रेतांच्या अंत्यसंस्काराला,
जागा न मिळे शव पुरण्याला.!
संकटाने या, सुरू झाले मदतकार्य,
माणसातील माणूसकीचे,
मानवतेचे, परस्पर सहकार्य,
घेऊन हातात हात,
करण्या संकटावर मात.!
विस्मरणात गेले सर्व, जात, धर्म, पंथ, वाद सगळेच्या सगळे,
गुंडाळले झेंडे,
हिरवे, भगवे, निळे, पिवळे,
एकमेकांचा जीव वाचविण्या,
सकलजण चहूकडे पळे,
फकस्त मानवतेचा धर्म पाळे.!
कोरोना गेला, तसा वैरभाव पुन्हा उफाळून आला,
पुन्हा तो जात, धर्म, पंथाच्या नावे, एकमेकांचे वाभाडे काढू लागला,
त्यात राज्य, आरक्षण,
अन भाषाने हातभार लावला,
आधीपेक्षा जास्त,कोलाहल माजला,
जणु काही याव्यतिरिक्त,
प्रश्नच उरले नाही देशाला.!
म्हणुन मी कोरोनाला, घालतो साद,
उठव आवई खोटी नाटी,
तू पुन्हा येण्याची,
ठेव कायमची टांगती तलवार, जीवघेण्या संकटांची,
मग पुन्हा विसरून जाईल माणूस,
जाती, धर्म, पंथ, राज्य,
आरक्षण अन भाषा वाद,
गुंडाळून ठेवील झेंडे,
हिरवे, भगवे, निळे पिवळे,निर्विवाद,
मग दिसेल सर्वदूर, आबादीआबाद.!
मग दिसेल सर्वदूर, आबादीआबाद.!
मग दिसेल सर्वदूर, आबादीआबाद.!!!
अरुण निकम,
9323249487.
मुंबई.
दिनांक…31/10/2025.
संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा
तसेच खालील वेबसाईटवर Click करा
दैनिक जागृत भारत
