समृद्धी महामार्गावर दुभाजकाला कार धडकून भीषण अपघात, एक मृत्यू.

दोन दिवसा पूर्वी समृद्धी महामार्गावर कार उलटून भीषण अपघात झाला होता. आता पुन्हा एकदा या महामार्गावर शुक्रवारी रात्री बुलढाण्याजवळ भीषण अपघात झाला आहे. भरधाव वेगातील स्वीफ्ट डिझायर कारचा समोरील टायर फुटला. त्यामुळे कार अनियंत्रित होऊन भीषण अपघात झाला. या दुर्घटनेत एकाचा मृत्यू झाला तर कारमधील अन्य प्रवासी गंभीर जखमी झाले आहेत.

जखमी प्रवाशांची प्रकृती चिंताजनक असून त्यांना तातडीने छत्रपती संभाजीनगर येथील रुग्णालयात दाखल करण्यात आले आहे.
याबाबत अधिक माहिती अशी, भरधाव वेगात असलेली स्वीफ्ट कार छत्रपती संभाजीनगरहून मेहकरकडे निघाली होती. कार समृद्धी महामार्गावर आली. कारचा वेग जास्त होता. समृद्धी महामार्गावरील खळेगाव चॅनल नंबर ३०३ परिसरात आल्यानंतर अचानक टायर फुटला. त्यामुळे कार चालकाच्या नियंत्रणाबाहेर गेली आणि काही कळण्याच्या आतच रस्त्यावरील दुभाजकाला धडकली. या अपघातात एक जण जागीच ठार झाला तर बाकीचे प्रवासी गंभीर जखमी झाले. या घटनेची माहिती मिळताच पोलीस घटनास्थळी दाखल झाले.
समृद्धी महामार्गावर मागील आठ महिन्यांच्या काळात तब्बल ७२९ अपघात झाले आहेत. यातील ४७ अपघातांत १०१ जणांचा मृत्यू झाला आहे तसेच ९९ अपघातांत २६२ जण जखमी झाले आहेत.
समृद्धी महामार्गावर वाहनांचा वेग भरधाव असतो. त्यामुळे वाहन नियंत्रित करणे सहजासहजी शक्य होत नाही. दोन दिवसांपूर्वी झालेल्या अपघातातही असेच घडले होते. गौरी गणपतीच्या सणासाठी कुटुंब पुण्याहून अमरावतीकडे निघाले होते. समृद्धी महामार्गावर असताना अचानक वन्यप्राणी आडवा आला. या प्राण्याचा जीव वाचविण्याच्या प्रयत्नात कार तीन वेळा पलटी झाली. या अपघातात कुटुंबातील महिला ठार झाली. तर अन्य तीन प्रवासी गंभीर जखमी झाले.

संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा

तसेच खालील वेबसाईटवर Click करा
दैनिक जागृत भारत