किरण माने
एरवी मुस्लीमद्वेषाची गरळ ओकत फिरणार्‍या मोदींना मुस्लीमप्रेमी चंद्राबाबूंना जवळ का करावे लागले? मुस्लीमांना आरक्षण देण्यासाठी कटिबद्ध असलेल्या टीडीपीचे पाय लाचारीने का धरावे लागले? अर्थात निर्लज्ज भक्तांना याचे काहीच वाटत नाही… पण ‘हिंदुत्वा’च्या नांवाखाली भरकटलेल्या बहुजन भक्तांचा मात्र गोंधळ उडाला आहे… त्यांच्यासाठी ही पोस्ट !
धर्माचे अवडंबर माजवणार्‍या जगातल्या कुठल्याही राजकीय पक्षाला धर्माफिर्माचे काहीही सोयरसुतक नसते हे मेंदूत कोरून घ्या. सगळा आटापिटा सत्तेसाठी असतो. छ. शिवरायांचे नांव घेऊन हे लोक मुस्लीमद्वेष पेरतात. पण शिवराय मुस्लीमद्वेष्टे होते का? तर अजिबात नाही. ते धार्मिक होते, पण त्यांनी काटेकोरपणे सर्वधर्मसमभाव पाळला. छ. शिवरायांच्या घोडदळात असलेले सातशे पठाण, विश्वासू साथीदार सिद्दी इब्राहिम, दौलतखान, मदारी मेहेतर वगैरे इतिहास आता सगळ्यांसमोर आलाय.
मुसलमान बादशहांच्या बाबतीतही हेच आहे. गजनीच्या महमूदाला आणि अल्लाऊद्दीन खिल्जीला ‘हिंदुद्वेष्टे’ म्हणून बरेच इतिहासकार समोर आणतात. पण तसे होते का? अजिबात नाही. ते क्रूर होते, जुल्मी होते पण सगळं पैशांच्या लोभापोटी होतं. यांनी भारतावर स्वार्‍या केल्या त्या फक्त संपत्तीच्या लूटीसाठी ! हिंदू मंदिरांमध्ये पैसा असतो. जडजवाहिरांचा प्रचंड खजिना असतो. केवळ त्यामुळे त्यांची नजर मंदिरांवर पडली.
“हिंदू देवळं जर मुसलमान मशिदींप्रमाणे संपत्तिविहीन आणि साधी असती तर, महमूद गझनवी आणि अलाउद्दीन खिलजी हिंदुस्थानाकडं फिरकलेही नसते.” असं काॅ.शरद पाटील लिहीतात ते उगीच नाही.
सोरटी सोमनाथच्या लूटीत अल्लाऊद्दीनला ६० मण सोनं, २ मण मोती, १०० मण चांदी व रेशमी कापडाचे ४००० तागे एवढं घबाड मिळालं ! आणि ही धर्माच्या नांवाखाली शूद्रातिशूद्रांचं शोषण करुन राजकोषात लपवलेली संपत्ती होती. आज पीएम केअर किंवा मंदिराच्या नांवाखाली गोळा केलेल्या निधीचा लपवलेला हिशोब हे त्याचेच आधुनिक रूप आहे.
अल्लाऊद्दीन खिल्जीच्या सैन्यात चितोडचे पाच हजार रजपूत आघाडीवर होते. मलिक नाईक हा सेनापती होता. म्हणजेच देवळांच्या या लुटीत हिंदुंनीही मदत केली होती. कारण, फक्त संपत्ती आणि सत्ता.
तर दोस्तांनो, या सत्ताधार्‍यांच्या ‘हिंदूराष्ट्र’ वगैरे सगळ्या भाकडकथा आहेत. हिंदु धर्म महत्त्वाचा असता तर शंकराचार्यांना उडवून लावून प्राणप्रतिष्ठा झाली असती? कधीच नाही. ‘वाराणसी,अयोध्या इथली अनेक छोटीमोठी मंदिरं, शिवलिंगं मोदीसरकारनं उद्ध्वस्त केली आहेत.’ असा आरोप स्थानिक लोक करताहेत. मग हे कसले हिंदुराष्ट्र?
भावांनो, आपला धर्म ही आपली वैयक्तिक आस्थेची गोष्ट आहे. ती ‘खतरे में’ वगैरे अजिबात नसते. तुम्हाला ‘येडं’ बनवून सत्तेचं आणि वर्चस्वाचं ‘पेढं’ खाण्यासाठी राजकारण्यांनी बनवलेला हा सापळा आहे. कुठलाही पक्ष आणि कुठलाही नेता धर्माचे रक्षण फिक्षण करणारा नसतो. जगातले सगळे धर्म टिकण्यासाठी स्वत: सक्षम आहेत, पुष्यमित्र शुंगानं बौद्धांचा पुर्ण विनाश करूनही आज बौद्ध धम्म देशात मानानं उभा दिसतो. तसंच हिंदू धर्माचंही आहे. जो कपटी नेता तुम्हाला भिती दाखवून ‘धर्मांध’ बनवतोय, त्याचा डोळा तुमच्या संपत्तीवर आणि सत्तेवर आहे, त्याच्यात कणभरही धर्मप्रेम नाही, हे नीट मनामेंदूत ठसवून घ्या.
किरण माने
संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा
तसेच खालील वेबसाईटवर Click करा
दैनिक जागृत भारत
