नाशिक: सामाजिक न्याय व विशेष सहाय्य विभागामार्फत १५ ते ३१ ऑक्टोबर या कालावधीत राज्यात जात वैधता प्रमाणपत्र देण्यासाठी विशेष मोहिमेचे आयोजन करण्याचे निर्देश देण्यात आले आहेत. त्यानुसार जिल्हा जात प्रमाणपत्र पडताळणी समितीने १५ ते २० ऑक्टोबर या कालावधीत विशेष मोहिमेचे आयोजन करून ५७१ प्रकरणांवर वैध निर्णय घेतले आहेत.
याबाबतची माहिती उपायुक्त तथा जिल्हा जात प्रमाणपत्र पडताळणी समिती सदस्य यांनी कळविली आहे. जात प्रमाणपत्र पडताळणीची प्रकरणे त्रुटी पूर्ततेअभावी अर्जदारांकडे प्रलंबित आहेत. अशा अर्जदारांना जिल्हा जात पडताळणी समितीने अर्जदारांच्या ई मेलवर त्रुटी कळविल्या आहेत. त्यांची पूर्तता अद्याप ज्या अर्जदारांनी केलेली नसल्याने त्यांची प्रकरणे प्रलंबित आहेत, अशा अर्जदारांनी त्रुटीसह व मूळ कागदपत्रांसह कार्यालयीन कामकाजाच्या दिवशी सकाळी १० ते दुपारी चार या वेळेत जिल्हा जात पडताळणी समितीच्या नागरी सुविधा केंद्र, नाशिक येथे उपस्थित रहावे. ज्या अर्जदारांकडून नमूद कालावधीत त्रुटींची पूर्तता न झाल्यास त्यांच्या प्रकरणांवर नियमानुसार कार्यवाही करण्यात येईल, असेही जात प्रमाणपत्र पडताळणी समितीने म्हटले आहे. कोणत्याही अर्जदाराने त्रयस्थ व्यक्तीकडे संपर्क करू नये व त्रयस्थ व्यक्तिच्या आमिषास बळी पडू नये, असे आवाहन करण्यात आले आहे.
संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा
तसेच खालील वेबसाईटवर Click करा
दैनिक जागृत भारत
