पुणे रेल्वे विभागांतील खासदारांची आज बैठक; रेल्वेसंबंधीच्या विविध प्रश्नांवर होणार चर्चा.

पुणे रेल्वे विभागात आज, शनिवारी (१४ ऑक्टोबर) सकाळी पुणे व सोलापूर रेल्वे विभागांतील खासदारांची बैठक होणार आहे. या बैठकीला १३ खासदार उपस्थित राहणार असून, त्यांच्याकडून विविध ठिकाणी थांबे, रेल्वे गेट, बंद गाड्या सुरू करण्याच्या मागणीसह विविध प्रश्नांवर चर्चा होण्याची शक्यता आहे. गेल्या वेळी नाराज होऊन चालू बैठकीवर खासदारांनी बहिष्कार टाकल्याच्या घटनेमुळे यंदा विशेष काळजी घेतली जात आहे.

मध्य रेल्वेकडून प्रत्येक वर्षी रेल्वे विषयीच्या प्रश्नांसाठी खासदारांसोबत रेल्वे अधिकारी बैठक घेतात. मध्य रेल्वेच्या व्यवस्थापकांच्या अध्यक्षतेखाली ही बैठक पार पडते. गेल्या वर्षी पुण्यात खासदारांच्या बैठकीत रेल्वे अधिकाऱ्यांकडून व्यवस्थित उत्तरे देण्यात येत नसल्याचे कारण देत सर्व खासदार चालू बैठकीतून बाहेर पडले होते. त्यामुळे बैठकीवर बहिष्काराचा विषय खूपच गाजला होता. थेट केंद्रीय रेल्वे मंत्र्यांपर्यंत हे प्रकरण गेले होते. त्यामुळे यंदा पुणे रेल्वे विभागाकडून विशेष तयारी केली जात आहे. या बैठकीला मध्य रेल्वेचे व्यवस्थापक नरेश ललवानी, पुणे रेल्वे विभागाच्या व्यवस्थापक इंदु दुबे, खासदार उदयनराजे भोसले, रणजितसिंह नाईक-निंबाळकर, श्रीनिवास पाटील, श्रीरंग बारणे, संजयकाका पाटील, धनंजय माने, डॉ. उमेश जाधव, ओमराजे निंबाळकर, सदाशिव लोखंडे, रजणी पाटील, डॉ. जयसिद्धेश्वर महास्वामी, डॉ. सुधाकर श्रृंगारे हे उपस्थित राहणार आहेत. इतर खासदारांनी त्यांच्या मागण्या पुणे रेल्वे विभागाला पाठविल्या आहेत. या मागण्यांवर रेल्वे अधिकारी खासदारांना बैठकीत उत्तर देणार आहेत; तसेच या बैठकीत प्रवाशांच्या दृष्टिकोनातून काही निर्णय होण्याची शक्यता आहे.

संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा

तसेच खालील वेबसाईटवर Click करा
दैनिक जागृत भारत