कसबा पेठेत मेट्रो कामगारांना मारहाण करुन २० हजारांची रोकड लुटली

कसबा पेठेतील साततोटी चौकात भुयारी मेट्रो स्थानकाचे काम करणाऱ्या कामगारांना धमकावून त्यांच्याकडील २० हजारांची रोकड लुटण्यात आली. याप्रकरणी फरासखाना पोलिसांनी चोरट्यांविरुद्ध गुन्हा दाखल केला आहे. याबाबत वाजिद वाहिद खान (वय २७, रा. लेबर कॅम्प, मुंढवा) याने फरासखाना पोलीस ठाण्यात फिर्याद दिली आहे. खान, त्याचे सहकारी मित्र अमोल गुजर, जनार्दन यादव पवळे चौकातील उपाहारगृहात चहा प्यायला गेले होते. तेथून ते साततोटी चौकातील भुयारी मेट्रो स्थानकाकडे निघाले होते. त्यावेळी रस्त्यात एकाने त्यांना धक्का दिला. त्यांच्याशी वाद घालण्यास सुरुवात केली. तेथून जाणारी रिक्षा थांबवून तिघांना पवळे चौकाकडे नेले. चोरटा आणि साथीदाराने त्यांना चाकूचा धाक दाखविला.
तेथील एका दुकानात खान, गुजर, यादव यांना नेले. धमकावून ऑनलाइन पद्धतीने २० हजार ३०० रुपये दुकानदाराकडे जमा करण्यास सांगितले. दुकानदाराकडून २० हजार ३०० रुपयांची रोकड घेऊन चोरटे पसार झाले. पोलीस उपनिरीक्षक मांजरे तपास करत आहेत.

संपूर्ण महाराष्ट्रातील घडामोडी व ताज्या बातम्या तसेच जॉब्स/शैक्षणिक/ चालू घडामोडीवरील वैचारिक लेख त्वरित जाणून घेण्यासाठी आमच्या व्हाट्सअँप चॅनलला Free जॉईन होण्यासाठी या लिंकला क्लीक करा

तसेच खालील वेबसाईटवर Click करा
दैनिक जागृत भारत